Avtokomponentlarni Qanday Tanlash: Genuine, OE, OEM, OES va Aftermarket O‘rtasidagi Farqlar

22.08.2025

Avtomobilingizga ehtiyot qism almashtirish vaqti kelganda, haydovchi oldida oddiy, ammo muhim savol paydo bo'ladi: qaysi detalni tanlash kerak? Variantlar ko'p, lekin eng ko'p uchraydigan besh tur mavjud - Genuine, OE, OEM, OES va Aftermarket. Keling, ularning ma'nosini sodda qilib tushuntiramiz.

Genuine - avtomobil brendi logotipi tushirilgan asl detal. Bu - zavodda mashinaga o'rnatilgan “ona” detal. Uni tashqi yetkazib beruvchi ishlab chiqaradi, lekin avtomobil ishlab chiqaruvchisi brendi ostida sotiladi (masalan, Audi, BMW yoki Toyota).

Misol: Audi zavodiga yetkazib beriladigan Textar tormoz kolodkalari Genuine Audi deb markalanadi va qimmatroq turadi.

OE (Original Equipment) - asl detalning aynan o'zi, lekin logotipsiz. OE qismlar - Genuine bilan bir xil, xuddi o'sha zavodda ishlab chiqarilgan, faqat avtomobil brendi emas, balki ishlab chiqaruvchi nomi ostida sotiladi.

Misol: xuddi o'sha Textar tormoz kolodkalari, lekin Audi belgisisiz - arzonroq, lekin sifat jihatidan farq qilmaydi.

OEM (Original Equipment Manufacturer) - mashhur brendlar ishlab chiqargan ehtiyot qismlar, lekin ular har doim ham sizning model uchun ishlatilmasligi mumkin.

Misol: NGK BMW'ga mos keladigan shamlar ishlab chiqaradi, garchi BMW o'zi Bosch'dan foydalansa ham. NGK - OEM-variant, u arzonroq, lekin sifatli.

OES (Original Equipment Supplier) - deyarli OEM bilan bir xil, faqat bunda detal bevosita avtomobil ishlab chiqaruvchisi bilan ishlagan yetkazib beruvchidan keladi.

Misol: Sachs amortizatori - zavodda o'rnatilgani bilan bir xil, lekin ishlab chiqaruvchidan to'g'ridan-to'g'ri olinadi, qo'shimcha narxsiz.

Aftermarket - mustaqil ishlab chiqaruvchilar ishlab chiqargan ehtiyot qismlar. Ba'zilari juda sifatli, boshqalari esa shubhali. Asosiysi - ishonchli brendni tanlash va texnik talablariga mos kelishini tekshirish.

Misol: SKF podshipnigi - yaxshi tanlov, lekin markasiz “no-name” detal - hamyoningiz va xavfsizligingiz uchun xavfli.

Nima Uchun Sifatsiz Avto Detallar Xavfli?

1. Xavfsizlikka Tahdid

• Tormoz kolodkalari o'z vaqtida ishlamasligi mumkin → YTH xavfi.
• Rul tizimi yoki osma yo'lda buzilishi mumkin.
• Havfsizlik yostiqchalari ochilmasligi yoki noto'g'ri ishlashi mumkin.

2. Avtomobilning Tez Eskirishi

Arzon detal tezda ishdan chiqib, boshqa qismlarga zarar yetkazishi mumkin.

Masalan: sifatsiz moy filtri → dvigatelga zarar. Shu bilan birga qo'shimcha qismlarga ortiqcha yuk tushadi.

3. Ortiqcha Xarajatlar

Tez-tez buzilishlar → qayta-qayta almashtirish.

Arzon detal = kelajakda qimmat ta'mir.

"Maydaga tejalgan - kapital ta'mirda yutqazgan."

4. Kafolat Muammolari

Agar “noaniq” detallar ishlatilgan bo'lsa, avtoservis kafolatli xizmatni rad etishi mumkin.

Rasmiy dilerlar faqat Genuine yoki sertifikatlangan OEM detallaridan foydalanadi.

5. Soxta Detallar Xavfi

Soxta detal tashqi ko'rinishda originalga o'xshashi mumkin, lekin kerakli xususiyatlarga ega emas.

Sifat nazorati yo'q, kafolat yo'q. Ba'zida bu shunchaki qayta ishlangan eski detallar bo'ladi.

Soxtadan Qanday Saqlanish Kerak?

• Narx juda arzonmi? Shubhali.
• Arzon qadoq yoki imlo xatolari bormi? Ehtiyot bo'ling.
• Seriya raqami yoki gologramma yo'qmi? Xavfli belgidir.
• Yo'riqnoma xatolar bilanmi? Yana bir ogohlantirish.
• Original detal bilan solishtiring - mahkamlash joylari, rangi yoki og'irligi boshqachami? Bu soxta bo'lishi mumkin.

Xulosa:

• Genuine - 100% moslik, lekin qimmat.
• OE/OEM/OES - sifatli va nisbatan arzonroq alternativalar.
• Aftermarket - byudjet varianti, lekin ehtiyotkorlik bilan tanlash kerak.